تاني تعالي وزي أمبارح....
عيدي جسور الوصل الكانت = جايبة قوافل الشوق الجامح
زيدي مساحة اللهفة البانت = في عينيك كان قلبك يسامح
سوقي غيوم الجفوة الحانت = لحظة تمشى خلاص وتبارح
واصلو الشوق لو جافى عيونك = زي ما خاصم بكره بصالح
وحاولي تلملمي شوقك كلو = حتى الشارد منو وسارح
عايني كمان في جرحي بتلقي = دمي دوام في حبك سابح
كوني غناي للوطن السيد = طوفي مداين واغشي مسارح
وابقي حروف للفكرة الواعدة = وحلي محل النص الرايح
ختي ملامحك ختما بارز = وامضى علي بالعطر الفايح
وكل الخوف لو باكر تابي = تدي غناي ابعاد وملامح
برضي بكون راجيكي وبحلم = أصلي بريدك كده بالواضح
